Saturday, March 30, 2013

Isang Mahabang Araw


Mahal kong Talaarawan,

    Mga ikaanim at kalahati pa lamang ng umaga ay bumangon na kami ni Cath dahil kinakailangan naming ayusin ang worship hall na kung saan ay doon kami natutulog dahil doon din ginaganap ang morning devotion tuwing umaga.
    Nang kami ay makapag-almusal ay sinimulan ng ng bawat isa ang kanilang mga gawain, habang ang iba ay binisita ang bahay ng mga bata, ako naman ay naglinis na lang ng mga salamin sa bintana ng worship hall dahil wala pa akong magawa.
    Nang hapon na ay nagsimula na kaming mag-ensayo para sa aming mga tutugtugin bukas sa pagsimba. Pagkatapos naming mag-ensayo ay naghapunan na kami at habang naghuhugas kami ni Cath ng mga pinggan ay bigla na lang nawalan ng koryente at sabi ni pastor na sa ikatlong palapag dahil mainit sa worship hall lalo na't walang koryente at siya ay umalis.
    Pero nang ikasampu na ng gabi ay nagkaroon na ng koryente at kami ay nagpudtrip dahil may mga dala si pastor na mga tsitsirya. Doon na kami natulog ni Cath sa taas dahil nakakatamad na lumipat sa baba kaso nga lang medyo nakakatakot dahil open ang lugar at wala pang pinto dahil hindi pa tapos gawin ang aming simbahan pero nakatulog rin ako sa kakalaro sa celpon.

Friday, March 29, 2013

Bakasyon Na Ba Talaga ?


Mahal kong Talaarawan,

    Maaga pa lang ay gising na kami ng aking kapatid dahil pupunta pa kami sa aming simbahan at hindi mawawala si Nemuel na lagi naming kasabay.
    Bago kami muling mag-ensayo sa pagtugtog ay ipinagpatuloy ko muna ang aking iginuguhit na mga larawan na pambata na gagamitin ngayon bakasyon dahil ilang araw ko na rin itong hindi nabibigyang-pansin dahil nagpipinta rin ako sa paaralan at sa Miyerkules ko na ibibigay kay ate Thea na guro ng mga bata. Naalala ko rin na may ipinagagawa pa pala sa aming mga kabataan si pastor Noi na isang komiks na ipamimigay rin sa mga bata siyempre ako na naman ang magguguhit. Hay naku! akala ko hayahay na ako ngayong bakasyon hindi pala. Pero mabuti na rin ito upang masanay at maintindihan ko na ang buhay ay punong-puno ng mga gawain.
    Dito na kami natulog ng aking kapatid kasama ang ibang kabataan, siyempre magkahiwalay ang babae sa lalake.

Thursday, March 28, 2013

May Praktis Pala ?

Mahal kong Talaarawan,     


   Hindi ko inasahan na pinapapunta pala ako sa aming simbahan upang mag-ensayo sa aming mga tutugtugin dahil may simba nga pala kami bukas kaya agad akong naligo at pumunta doon. 
   Nang matapos kaming magpraktis ay naglaro kami ng iba pang mga kabataan ng volleyball. Ang sakit-sakit pala sa kamay lalo na kapag hindi marunong. Ilang beses rin tumalsik ang bola sa kabila na kung saan ay may mga bahay kaya ginabi na lang kami sa kakahanap parati ng bola sa kabila.
   Gabi na ng kami ay natapos at nagdadalawang-isip kami ng aking kapatid kung uuwi kami o doon na lamang matutulog at sa umaga na lang aalis dahil inaantok na rin kami pero nang malaman namin na aalis din si pastor Noi ay umuwi na rin kaming kasabay niya, lagi kasi kaming nililibre ng pamasahe nun sa tuwing makakasabay namin siyang umuwi hehe.

Wednesday, March 27, 2013

Praktis-praktis Lang .


Mahal kong Talaarawan,


    Hindi kami magpipinta ngayon sa paaralan dahil sa Lunesnaman daw ulit kaya dito lang ako sa bahay at walang ibang ginawa kundi manood ng mga pelikula kasama ang kapatid ko, matulog at magpraktis ng piyano.
    Nang magising ako mula sa pagkakatulog ko ng hapon ay sinamahan ko si mama sa talipapa upang mamalengke at pag-uwi namin ay muli akong nagpraktis ng pagtugtog ng piyano, ang hirap pala kapag walang nagtuturo sa iyo at nagsisisi ako na dapat pala nung bata palang ako ay nagsimula na akong mag-aral nito dahil base sa nabasa at napapanood ko sa youtube ay mas madali daw matuto ang mga bata ng piyano dahil malalambot pa ng kanilang mga daliri. Ang mga pinag-aaralan kong tugtugin ay ang Lu Xiao Yu na isa sa mga ginawang musika ni Jay Chou sa pelikulang Secret.. Ang gaganda kasi ng mga musika na gawa niya.
    Pagkatapos nito ay nanood kami ng aking kapatid ng isang pelikula na may pamagat na Love in Disguise at nang ako ay matutulog na ay naalala ko na hindi ko pa pala nagagawa ang ipinapaguhit sa akin sa aming simbahan at naalala ko rin na hindi pa pala ako naghahapunan, puro kasi tinapay ang kinain ko kaya hindi ako nakaramdam ng gutom.

Tuesday, March 26, 2013

Di Pa Rin Maka Move-on sa Secret :>


Mahal kong Talaarawan,

    Hinapon na naman ako ng uwi kasabay si Jelly dahil nang matapos kaming magpinta sa paaralan ay pumunta kami sa bahay ni Xandra upang manood ng pelikula. Pagdating namin ay nadatnan namin ang ate niya na gumagamit ng kompyuter at gusto niya ring manood. Ang gusto nilang pelikula ay Secret dahil kumalat ang kwento sa marami ng ikwento ko kay Jelly at dahil gusto ko rin naman ulit itong mapanood, ito nga ang pinanood namin.
Siyempre di pa kami nanananghalian kaya doon kami sa kanila pinakain ni Sandra haha kung san-san na lang kami parati ni Jelly nakikikain. Pagkatapos nito ay sunod naming pinanood ang A Werewolf Boy dahil gusto itong mapanood ni Jelly at nang matapos na ay umuwi na kami ni Jelly.
Masaya pa ring panoorin ang mga pelikulang ito kahit napanood ko na ang mga pinanood namin kanina, sa bagay lahat naman kasi ng pelikula sa flash drive ko ay napanood ko na.

Monday, March 25, 2013

'Yun Pala 'Yung Tinatawag Na Movie Marathon ?


Mahal kong Talaarawan,


    Hay naku naman! kahit bakasyon ay nagpipinta pa rin kami sa paaralan pero ayus lang dahil may kasabay naman akong maglakad at iyon ay si Jelly.
    Nang ika-isa na ng hapon ay pumunta kami ni Jelly at Xandra sa bahay nila Soltes upang manood ng pelikula kaso hindi ko masyadong nagustuhan ang pelikulang pinanood namin na may pamagat na Warm Bodies. Nakakabagot kasi at masyado na akong naadik sa mga pelikulang asiyano kaya hindi ko ito nagustuhan dahil ito ay english movie.
    Ika-lima na ako nang makauwi sa bahay at sinabi ko naman na nagpunta pa ako sa bahay ng kaklase ko kaya ganoong oras na ako nakauwi at mabuti'y hindi naman ako pinagalitan at pinayagan pa kaming manood ng pelikula.
    Kungfu Dunk ang pamagat ng pinanood namin ng kapatid ko at maganda din ito kahit na medyo panlalaki dahil tungkol sa pagbabasketbol. Medyo hawig ang kwento niya sa anime ng japan na Slam Dunk. Bida dito si Jay Chou kaya mas nagustuhan ko ito, nagiging paborito ko na kasi siya dahil sa pelikulang Secret sobrang talentado talaga siya at magaling din siyang gumanap para sa akin, pati na rin si Guey Lun-Mei. Gusto ko ring panoorin ang mga pelikula ni Lun-Mei kaso nga lang wala masyadong napopost na pelikula niya sa pinagddownloadan ko.

Friday, March 22, 2013

Ang Saya Maligo sa Ulan !


Mahal kong Talaarawan,

    Sobrang bagal ng kapatid kong kumilos kaninang umaga kaya hanggang brgy. hall lang kami tuloy naihatid ni papa dahil mahuhuli na siya sa trabaho kaya naman hingal na hingal na naman akong nakarating sa silid-aralan.
    Habang tinuturuan ko ang mga kamag-aral ko ng pagtugtog ng gitara ay ipinatawag na naman ako kasama sina Dexter, Sablay, Robles, Diether, at Amor upang pintahan ang mga kagamitang gagamiting ng mga sasayaw.
    Nang ako ay naglalakad pababa ng siruna ay umambon ng malakas kaya naman binuksan ko ang aking payong at naalala ko ang aking kapatid na nasa paaralan pa ata dahil katatapos pa lamang ng recognition kaya bumalik ako. Hindi ko siya natagpuan at nakita ko si Jelly-Ann Vega kasama ang isa niyang kamag-aral na si ate Shiela at sila ang nakasabay ko sa pag-uwi. Kumakain kami ng sorbetes habang naglalakad pababa nang biglang bumuhos ang napakalakas na ulan kaya naman agad kong binuksan ang aking payong ngunit nababasa pa rin kami dahil hindi kaming tatlo magkasya sa iisang payong na mahuna kaya ng makakita kami ng silungan ay agad muna kaming sumilong at itinabi ang aming mga kagamitang hindi pwedeng mabasa at kami ay naligo sa ulan. Ang saya-saya talaga dahil unang beses ko itong maligo sa ulan galing sa paaralan.
    Pagdating ko sa bahay ay pinabanlaw ako sa labas ni mama at pinagsabihan na dapat ay sinolo ko na lamang ang payong, grabe talaga si mama. Nang ako ay matapos maligo ay binuksan ko ang kompyuter at nagdownload na naman ng kung anu-anong pelikula.

Thursday, March 21, 2013

Epic Fail Naman Lagi Mga DVD Nila !


Mahal kong Talaarawan,

    Pagkatapos naming magpinta ay hindi muna ako umuwi sa bahay dahil manonood pa kami kasama ang aking mga kamag-aral sa bahay ng aming kaklase dahil dala ko ang flash drive ko kaso hindi gumagana sa kanilang dvd ang aking flash drive tulad ng kila vega kaya nagsi-uwi na lang kame.

Wednesday, March 20, 2013

Ang Ganda-ganda Talaga ng Secret !

Mahal kong Talaarawan,


   Siyempre tulad pa rin ng dati pagkarating ng paaralan ay diretso agad sa aming pinagpipintahan upang magpinta hanggang uwian. Bago ako umuwi ay pumunta muna ako kay Gng. Mixto upang magbigay ng ilang pelikula ngunit wala sa kanya ang kanyang laptap kaya sinabi ko na bukas na lamang, para na rin maidagdag ko ang mga bagong iddownload ko pag-uwi. Mga dalawa kasi ang nai-ddownload ko sa isang araw at pinapanood ko naman kapag gabi.
   Nang gabi na ay nanood kami ng aking kapatid ng isang pelikula na may pamagat na Secret at sobrang ganda talaga ng kwento niya at nagagandahan talaga ako sa bidang babae na si Guey Lun-Mei. Bilib din ako kay Jay Chou dahil sa siya na ang sumulat, direktor, gumawa ng musika at ang bida. Ang galing-galing niya ding magpiyano grabe!    
   Nung napanood ko ang pelikulang ito ay naalala ko ang isang trailer na napanood ko dati sa youtube na gustong-gusto kong mapanood at natuwa ako na napanood ko na ito ngayon.    
Nang matutulog na kami ng kapatid ko ay pinagkukwentuhan pa rin namin ang pelikulang ito dahil ang ganda-ganda talaga.

Tuesday, March 19, 2013

Sayang 'Di Kami Nakapanood

Mahal kong Talaarawan,

    Walang kaming pasok ngayon dahil araw ng pagtatapos ng mga nasa ikaapat na taon kaya wala akong ibang ginawa kundi ang mag-aral kung paano magbasa ng nota at magdawnlowd ng mga pelikula. Nagbisekleta din kami kanina ng aking kapatid at medyo natagalan kami dahil kung saan-saan kami nagpupunta.
    Nang ikalawa na ng hapon ay naalala ko na pupunta pala ako ngayon kila Jelly upang kami ay manood ng mga pelikula kaya ako ay nagpahinga dahil galing ako sa kompyuter at tsaka naligo.
    Sabi niya ay wala siyang gagawin ngayon ngunit pagdating ko sa kanila ay gumagawa siya ng proyekto sa E.P. Ipinasak namin ang aking kard rider na may memory kard sa kanilang dvd ngunit hindi lumalabas ang pelikula kaya sinubukan naman namin ang flash drive na dala ko at hindi rin ito binabasa ng kanilang dvd kaya wala akong ibang ginawa kundi tulungan na lamang siya sa paggawa niya ng pamplet na proyekto niya sa E.P. at nagbasa ng libro mula wa wattpad sa kanyang celpon at ng ikaapat na ng hapon ay umuwi na ako sa bahay. Ayus lang na hindi kami nakapanood dahil ang mga gusto niya naman panoorin ay napanood ko na tulad ng windstruck at a werewolf boy at sigurado akong maiinip lamang ako. Pero masaya pa rin sana kung nakapanood kami dahil harutan toda max na naman ang mangyayari. 

Monday, March 18, 2013

Anu Ba Yan! Gusto Ko Pa Naman Maglinis .

Mahal kong Talaarawan,

    Huling linggo na itong pasok namin at medyo sabik akong pumasok ngayon dahil maglilinis lang kami ng silid-aralan at magliliha ng mga upuan na paborito ko.
    Natakot ako kanina dahil bigla na lamang nangisay ang kamag-aral ko at iniuuntog niya ang ulo niya sa upuan sa harap niya kaya inialis ko at muntik na siyang mahulog sa upuan niya kaya binuhat na siya ng aking mga kamag-aral at dinala sa pagamutan. Matagal kasi bago siya napansin ng aking mga kamag-aral at kahit sinasabi na namin sa kanila ay walang makarinig dahil sobrang ingay talaga dahil wala pa kaming guro.
    Maya-maya ay ipinatawag na naman ako ni sir Espina at ang iba ko pang kasama sa pagpipinta kaya hindi tuloy ako nakasama sa paglilinis at paglilihaat nang nag-uuwian na ay pinauwi na rin kami ni sir at ako naman ay umuwi na rin kaagad dahil umuulan-ulan at naiwan ko ang payong ko ngunit tumitila din naman.
   Nang ako ay makauwi na ay tumulong muna ako kay mama sa paglalaba upang ako ay kanyang payagan na pumunta kila Vega bukas.

Sunday, March 17, 2013

Yuhooo! May Keyboard na Ako !


Mahal kong Talaarawan,

    Matapos magsimba ay agad akong umuwing mag-isa dahil hapon pa uuwi ang aking kapatid at mag-iikalawa na ng ako ay makarating. Pagdating ko sa bahay ay nagpahinga muna ako dahil sa pagod at sobra na talaga ang init dahil tag-araw na. Habang nagpapahinga ay nanood kami nila papa at mama ng isang pelikula na may pamagat na A Moment In Time. Hindi ako masyadong nagandahan dahil hindi ko gusto si Julia sa mga palabas pero ang ikinaganda ay ang mga iba't-ibang bansang pinagganapan at ang pagganap ng magaling na aktor na si Coco Martin.
Matapos ito ay umalis kami ni papa at mama upang bilhin ang keyboard na tinignan namin dati sa surplus at nakakasigurado kami na hindi pa ito nabibili dahil pinuntahan ito kaninang umaga ni papa. Pagdating namin doon ay wala na doon dahil ipinadala ng may-ari/tindero sa isa nilang surplus sa Antipolo Robinson Homes kaya pumunta kami ni papa sa Antipolo at si mama naman ay umuwi na dahil hindi siya sana'y sa mahabang biyahe. Pagdating namin malapit sa simbahan ay itinuro sa akin ni papa ang keyboard na ibinebenta sa tindahan ng mga instrumento na Twinkle, ito ay bago at P2,800 lang ang halaga kaso nga lang ito ay china kakaunti ang pindutan kumpara sa isa at ayos na ito para sa akin ngunit sinabi namin na babalikan na lamang namin. Hinanap namin ni papa ang itinurong surplus na nasa tapat Robinson Homes at ito ay nakita namin at nandoon nga ang keyboard na yamaha PSR E323. Nagagandahan talaga ako sa tunog nito at mas marami ang mga pindutan nito. Kahit na sira ang LCD nito ay napawi naman ng mga magagandang bagay na mayroon dito kaya ito ang binili namin ni papa sa halagang P2,900, tinawaran kasi namin ni papa dahil ang tunay na halaga nito ay P4,100, at ang bago naman ay P7,000 .
Bitbit ko ito habang sakay kami sa mutor at sobrang haba talaga ng biyahe kaya gabi na kami ng makauwi. Yung may-ari kasi alam ng bibilihin pinadala pa kung saan. Pero masayang-masaya talaga ako dahil mayroon na ako nito. Mas gusto ko kasi ang instrumentong ito kaysa sa gitara dahil kahit na nakakalito itong pag-aralan dahil sa mga nota ay mas malambot namang pindutin kaysa sa gitara dahil lagi na lamang sobrang kapal ng mga kalyo ko sa mga daliri dahil sa gitara.

Saturday, March 16, 2013

Liham Para Kay Gng. Marvilyn Mixto ^_^

Mahal Kong Guro,  


   Una po sa lahat, ako po ay nagpapasalamat sa inyong pagtuturo sa amin, pag-uunawa, at sa panghihikayat na matuto. Natutuwa po akong magkaroon ng isang guro na katulad niyo dahil sa inyo ay nagkaroon ako ng interes sa asignaturang Filipino at pahalagahan ito.   

   Nagustuhan ko po na binigyan niyo kami ng pagpipilian sa paggawa ng proyekto at iyon ay ang paggawa ng portpolyo o blog. Dito ako nagkaroon ng pagkakataon na gamitin ang kompyuter na lagi kong kaharap sa paggawa ko ng proyekto. Talagang nakakapanghikayat kayong magturo dahil may halong patawa hindi lamang sa inyong pagtuturo, maging sa pagkukwento niyo tungkol sa buhay niyo noong kayo ay bata pa  at hindi ninyo direktang sinasabi ang pangalan ng mga nag-iingay, kumbaga ay hindi kayo namamahiya. Para sa akin ay kayo ang pinaka da best na naging guro ko sa Filipino. Ito po ay hindi pampalubag-loob lamang kundi may katotohanan at mula sa aking puso.   

   Sana po ay marami pa kayong maturuan na estudyante at marami pa sana ang matuto mula sa inyo pero mas masaya po kung kayo ulit ang aming magiging guro sa Filipino sa susunod na pasukan. Maraming salamat po talaga sa lahat-lahat at mamimis ko po talaga ang pagtuturo ninyo. <3                                                                                                                                                                                                               

-Sairah


Huli Na Naman sa Pagpapraktis .


Mahal kong Talaarawan,

    Hindi ako maaga ngayon pumunta ng aming simbahan dahil may mga guhit ako na kailangang tapusin. Medyo natagalan ako sa pagkokompyuter kaya hindi ko namalayan na ikatatlo na pala ng hapon kaya ako ay nagpahinga ng kaunti at tsaka naligo ng mabilis at nang ako ay naglalakad na upang pumunta sa sakayan ng dyip ay nagkasalubong kami ni papa at ihahatid na lamang niya ako kaya bumalik ulit kami sa bahay upang kumain si papa at kunin ang isang helmet. Ikaapat na ng ako ay makarating sa simbahan at tapos na pala ang pagpapraktis kaya ipinagpatuloy ko na lamang doon ang pagguguhit ko ng mga larawang pambata mula sa mga istorya sa bibliya na gagamitin ng mga guro na kanilang biswal sa kanilang pagtuturo sa darating na bakasyon.

Friday, March 15, 2013

Ang Saya ! May Natanggap Akong Karangalan ^^


Mahal kong Talaarawan,

    Ngayon ang huling araw ng aming pagsusulit para sa ikaapat na markahan. Medyo hindi na ako kinakabahan dahil Math nalang ang natitirang mahirap na asignatura at ang iba ay medyo madali na.
    Medyo nagdikit-dikit yata ang mga upuan ngayon hindi tulad kahapon kaya kabi-kabila ang mga tanungan at silipan ng sagot at hindi sila sinisita parati ng aming guro. dahil abala din sa pagrerekord ng aming mga marka. Naiinis talaga ako kapag ganito dahil minsan halos lahat ay pumapasa samantalang ako ay bagsak lalo na sa asignaturang A.P. pero minsan iniisip ko na lamang na ayus lang iyon dahil hindi naman mababago ng isang pirasong bagsak na papel ang hinaharap ko.
    Matapos kaming kumuha ng pagsusulit ay hindi muna kami agad umuwi dahil may programa pang isinagawa si Gng. Mixto para sa mga magkakamit ng karangalan sa mga gumawa ng maikling pelikula at blog. Kinabahan talaga ako nang ako ay tumugtog dahil hindi ko inakala na may iba pa palang pangkat kaming kasama. Hindi ko rin inaasahan na isa ako sa mga nagkamit ng karangalan sa mga gumawa ng blog. Natuwa talaga ako dahil ngayon lamang ako nagkamit ng karangalan sa mula asignaturang Filipino.
    Hindi muna ako umuwi dahil ipinatawag ako ni Gng. Cabrera at ipinaalam sa akin na bumaba ng dalawa ang aking marka sa A.P. mula sa 84 ay naging 82 pati na rin ang iba ko pang kasama sa pagpipinta at hindi pa niya alam kung tataas pa iyon kapag naiwasto at naidagdag ang tama ng aming mga papel mula sa ikaapat na markahang pagsusulit. Matapos niyang sabihin iyon ay hindi kaagad niya ako pinauwi dahil inutusan pa niya akong magwasto ng mga papel. Nang maidagdag niya ang aking puntos ay mabuti daw at umabot. Napag-isip-isip ko na siguro kaya iyon tumaas ay dahil pinagwasto niya ako ng mga papel at nagdagdag ng puntos dahil imposible namang umabot iyon eh bagsak nga yung papel ko. Pero kahit ganoon ay masaya pa rin akong umuwi dahil tumaas siya kahit papaano at sa natanggap kong karangalan.
    Pagdating ko sa bahay ay ayaw maniwala ni mama na ako ang may pinakamahusay sa paggamit ng wikang filipino sa blog. Habang nagkokompyuter ako ay dumating si papa at nagalit nang makita ang pusa namin na kinakain yung ulam namin tapos ibubuntong kay mama yung galit dahil sira daw yung hawakan ng kawali.
    Iyon lamang ang bagay na kinakainisan ko kay papa, mainitin ang ulo at palaging ibinubunton sa iba ang galit at ang mga bagay na hindi naman dapat problemahin ay pinoproblema kaya ako ay tumigil sa paggamit ng kompyuter at natulog kahit hapon na dahil sa inis. Nang magising ako ay hindi ko namalayang umaga na pala. 

Thursday, March 14, 2013

Ang Unang Araw ng Pagsusulit sa Ikaapat na Markahan -_-


Mahal kong Talaarawan,

    Ikapito ang aming pasok ngayon dahil araw ngayon ng aming markahang pagsusulit kaya hindi ako gaanong nagmadali at tila medyo maga pa ang aking mga mata. Hindi ako nakapagbalik-aral kagabi kaya dinala ko ang aking ilang kwaderno na kung saan ay maaari naming pagkuhaan ng aming pagsusulit ngayon. Pagdating sa silid-aralan ay agad akong umupo at kinuha ang aking kwaderno sa Chemistry at nagbasa-basa at kinabisado ang ilang pormula ngunit ang iba ay hindi ko na maintindihan kaya kwaderno naman sa Filipino ang aking kinuha dahil dito ay malaki ang aking tsansang pumasa kaysa sa Chemistry.
Nang dumating na si Gng. Norbie ay sinabi niya na Chemistry ang una naming pagsusulit at tila wala pa ako sa sarili dahil inaantok pa ako dahil sa nangyari kabagi. Habang kami ay nagsasagot ay sinabi ng aming guro na E.P. ang susunod kaya medyo natuwa ako dahil madali lang iyon at maaari pang makapagbalik-aral sa aming libreng oras.
Pagkatapos ng Chemistry ay E.P. naman at tuloy-tuloy ang aking pagsasagot dahil madali lang ngunit sumakit pa ang tiyan ata o puson ko at ang hirap kaya magsagot ng pagsusulit sa ganong kalagayan. Sa bandang dulong mga katanungan ay medyo nahirapan ako, anu ba namang malay ko sa babaeng gumanap na Eponin sa Les Mesirables? Michael Jordan pa ang naisagot ko sa PBA na naging senador na dapat ay si Jaworski. Yung mga tanong kasi wala naman sa aming mga pinag-aralan at hindi ko naman kilala yung mga yo'n tapos bigla nalang sa pagsusulit ng E.P.
Nang matapos ang E.P. ay tsaka ang aming libreng oras at ito ang pagkakataon na ako ay makapagbalik-aral. Filipino na lamang ang aking binasa dahil hindi na ako kukuha pa ng pagsusulit sa MAPEH dahil gumagawa kami ng mga kagamitan ng mga mananayaw. Nang magsimula na kaming magsagot sa Filipino ay may mga tanong na malalalim at bibigyan ng kahulugan na halos may kaparehas sa mga pagpipilian kaya medyo nahirapan din ako at sumasabay pa yung pagsakit ng tiyan ko ata o puson, di ko kasi alam kung saan banda yung puson at tiyan. Nalito rin ako sa dulo na patungkol sa ribyu dahil parang kakaibang ribyu ito. Pagkatapos ng Filipino ay lumabas na kami ng mga kasama ko sa paggawa ng kagamitan dahil hindi na kami kukuha ng pagsusulit sa MAPEH.
Ikatatlo na ng hapon ng ako ay makauwi dahil umuulan at wala akong dalang payong at hinintay ko pa si Joanne na aking kasabay dahil ngayon ay kanyang interbyu.

Wednesday, March 13, 2013

Pagsusuri sa Kabanata IV ( Takdang-Aralin )

   Isa ito sa aming takdang-aralin mula sa pag-aaral namin sa kabanata IV ng Noli Me Tangere na may pamagat na Erehe at Pilibustero. Sinagutan namin ang takdang-aralin na ito sa pamamagitan ng pagkuha ng mga bahagi ng kabanata na nagpapatunay sa mga sumusunod na pangungusap. Pinagtuunan ng pansin sa kabanatang ito ang mga pangyayari sa buhay at ang sinapit ni Don Rafael Ibarra.


Pagsulat ng Sanaysay ( Gawaing Indibidwal )

 Dito naman ay inatasan kami ni Gng. Mixto na sumulat ng isang sanaysay tungkol sa mga katangian ng mga kababaihan sa ngayon.


Takdang-Aralin !

   Ito ay ang aking kasagutan sa aming takdang-aralin sa panuto na kung ano ang mga bagay na dapat isaalang-alang sa pagpili ng kurso sa kolehiyo.


Pagsusulit .

   Isa sa aming pagsusulit sa kwaderno .


Positibo at Negatibong Katangian ( Takdang-Aralin )

   Ito ay isa sa aming takdang-aralin na kung saan ay ilalahad namin ang positibo at negatibong katangian ng isa sa aming mga magulang.


Di Tuloy Nakapag-Ribyu ! T_T


Mahal kong Talaarawan,

    Nang Mapeh na ang asignatura namin ay iniliban muna kami ni G. Espina upang simulan ng pinturahan ang mga kagamitang gagamitin sa pagsasayaw ng mga mananayaw ng MNHS para sa darating na pista ng tipulo. Nang sumapit na ang aming libreng oras ay bumalik na kami sa silid-aralan ngunit natagpuan pa namin doon si Gng. Mixto at binibigyan niya ng komento at puna ang bawat isa at napasama pa ako.
    Mag-iikalawa na ng hapon ng ako ay makauwi dahil tinapos na namin ng aking mga kagrupo ang aming mga proyekto. Pagdating sa bahay ay nainis na naman ako ng makita ko ang kapatid ko na naglalaro na naman ng dota at hindi na ako makagamit ng kompyuter at hinahayaan lamang siya parati ni mama palibhasa kasi paborito siya. Nang malapit ng dumating si papa ay tsaka niya lamang sa akin pinahiram at tila nang-aasar pa at hindi talaga tumigil ng pang-aasar kaya humantong kami sa pag-aaway at nasugatan pa ako sa daliri. Nadatnan na lamang ako ni papa na umiiyak kaya pinagalitan kami parehas. Ipinagpatuloy ko ang aking paggagamit ng kompyuter upang ipaskil ang aking mga pagsusulit sa blog habang umiiyak at pinagsasabihan ni papa.
    Nang matapos akong magkompyuter ay nagpunta na lamang ako sa banyo upang naghilamos at naglinis dahil sobrang init talaga ngunit nang paglabas ko ay ipinagpatuloy na naman ni papa ang kanyang pangangaral hanggang hatinggabi hanggang sa ako'y antukin at hindi na nakapagribyu pa para sa ikaapat na markahangl  pagsusulit bukas kasama na rin iyon sa pangangaral niya na hindi ako tuloy nakapagribyu.

Tuesday, March 12, 2013

Sige ng Tulog May Gawain Pa Pala .


Mahal kong Talaarawan,

    Nakakahiya naman natawag pa ako kanina sa mga magbabasa ng liham sa Filipino. Sa totoo lang hindi talaga iyon ang liham na ginawa ko, sa papel ko lamang isinulat ung liham ko. Babasahin kasi pala sa harapan at ayaw ko talaga dahil wala pa akong lakas ng loob para don.
    Pagkatapos ng aming klase ay hindi kaagad ako umuwi dahil ipinagpatuloy namin ang aming pagpipinta na aming proyekto sa T.L.E. dahil bukas na ang pasahan no'n at kung wala kaming maipasa ay blanko ang marka namin. Hindi ko masyadong napagtuunan ng pansin ang proyektong ito at hindi ako masaya habang ginagawa ko ito dahil ayaw ko talagang pangkatan ang proyekto namin sa T.L.E. dahil masyadong nagiging kampante at mapag-aksaya sa pintura ang mga kagrupo ko dahil alam nilang makakapagpasa kami dahil kagrupo nila ako.
    Mag-iikatlo na ng hapon ng ako ay makarating sa bahay at nang makakain na ay bigla akong nakaramdam ng antok dahil ilang tanghali ng hindi ako nakakatulog. Medyo napahaba ang tulog ko at ika-pito na ng gabi ng ako ay magising at nakalimutan kong may iguguhit pa pala ako na ini-atas sa akin ni Cagas para sa proyekto namin sa English at aayusin ko pa pala yung mga tinipon na pagsusulit ko sa English dahil pasahan na bukas.

Monday, March 11, 2013

Unti-unti Nang Nababawasan Ang Aking Gawain ! Hehe :D


Mahal kong Talaarawan,

    Nahuli ako sa aking pagpasok kanina pero mas huli ang aking guro kaya ayus lang ganito naman kami palagi kapag Lunes. Kinabahan pa ako kanina nang sinabi sa akin ni Necor na aking katabi na ngayon daw ang pasahan ng aming mga tinipong gawain sa English dahil hindi ko dala ang akin at babalik na naman ako ng tanghaling tapat at ang pagkakaalam ko'y sa Huwebes pa ang pasahan nun pero sila pala ang nagkamali dahil sa Huwebes pa nga ang pasahan.
    Sinabi ni Gng. Mixto na aking guro sa Filipino na sa Biyernes na ang pasahan ng mga portpolyo at blog kaya agad kong i-napdeyt ang aking blog, nilagay ko na ang aking mga pagsusulit at iba pang gawain.
    Medyo ikalawa na ng hapon nang ako ay makauwi dahil inayos ko ang pagguguhit ng mukha ni sir Espina dahil medyo malaki ang bibig at tawa talaga ng tawa ang aking mga kaklase nang ipakita ko sa kanila kaninang umaga at mismo ako rin ay natawa. Bakit ba kasi si sir Espina ang napiling iguhit ko, nahirapan talaga ako sa bibig dahil kapag medyo nalalakihan ko ang pagngiti ay sobrang laki daw sabi ng aking mga kamag-aral, pero kapag naman nililiitan ko ng konti sobra naman daw gwapo. Hindi ko na nga maintindihan kung anu talaga ang tama wala kasi akong kinokopyahan pero nang matapos ko ito ay nakontento na sila kaso nga lang kamukha daw ni Jao ng Princess and I. Pero tinanggap na ito ng aming lider na si Cagas at kasabay ko siyang umuwi.
    Nang ako ay makakain ay tsaka ko isinaayos ang aking blog at gumawa ng aking takdang-aralin sa Filipino kaso hindi ko pa alam kung sino ang tutukuyin ko sa paggawa ko ng liham.

Pagsusulit !

   Ito ay isa sa aming mga pagsusulit ngayong ikaapat na markahan mula sa aming pag-aaral sa nobelang Noli Me Tangere.



Ribyu !

   Sa gawain naming ito ay may kapares kami na aming kamag-aral na kung saan ay kakapanayamin namin ang bawat isa tungkol sa kanyang nabasang libro o napanood na pelikula at ito'y aming gagawaan ng ribyu.


Kahulugan At Pagiging Makapangyarihan ( Takdang-Aralin)

   Sa takdang-araling ito ay aming bibigyang kahulugan ang ilang pahayag mula sa akdang Banyaga ni Liwayway Arceo at kung paano ito naging makapangyarihan.


Mensahe Para sa Pangulo ( Pagsasanay )

   Ito ay isang pagsasanay sa pagsulat na kung saan ay inatasan kami ng aming guro na sumulat ng isang mensahe sa pangulo ng ating bansa tungkol sa mga problemang kinakaharap ng ating bansa at kung papaano ito masosolusyunan. Kasabay ng pagsasanay na ito ang aming pag-aaral sa maikling kwentong Bangkang Papel ni Genoveva Edroza Matute.


Himala (Liriko)

   Ito ay isa sa mga awiting aming tinalakay nang aming pinag-aaralan ang buod ng pelikulang Himala ni Ricky Lee.


Sunday, March 10, 2013

Gabi Na Tuloy Nakauwi .


Mahal kong Talaarawan,

    Halos parang hindi rin ako nakatulog ng maayos kagabi dahil doon ako natulog sa aming simbahan at hindi ako nakakatulog ng maayos doon dahil maya't maya akong nagigising dahil bukas ang ilaw kaya parang inaantok-antok pa ako habang binibitbit namin ang mga instrumento at spiker upang dalhin sa ikatlong palapag dahil doon kami nagsasagawa ng aming pagsisimba.
    Napansin ko na kaunti lamang ang mga taong nagsimba ngayon at hindi ko alam kung bakit. Isa na sa wala sila mama at papa kaya hindi ako nakauwi ng maaga, sa kanila kasi ako sumasabay pauwi tuwing Linggo. Pagkatapos naming mananghalian ay muli kaming nag-ensayo ng aming mga tutugtugin para sa isang pagpupulong ng mga kabataan. Nagustuhan ko ang mga itinuro sa amin ngayon na tungkol sa lumalalang kahirapan ng ating bansa at bilang kabataan ay may magagawa ako.
    Matapos ito ang ibang mga kabataan ay kinausap muna ng aming pastor na kung saan ay isa doon ang aking kaibigan na kapit-bahay kaya kinakailangan ko pa siyang hintayin at kakaunti lamang kaming naiwan sa isang bukas na silid na kung saan ay palaging naroon ang mga kabataan dahil malamig doon at may libreng wifi.
    Habang kami ay naghihintay ay nanood muna kami ng ng mga palabas ni kuya Jobert sa youtube. Sobra talaga siyang nakakatawa dahil magaling talaga siyang magpatawa at maya-maya pa ay umuwi na kami at siyempre ika-siyam na naman ng gabi kami nakauwi.

Saturday, March 9, 2013

Tambak Na Naman Ang Aking Mga Gawain !


Mahal kong  Talaarawan,
                       
                        Ikalima pa lamang ng umaga ay nagising na ako dahil ang sasama ng panaginip ko na kung saan dapat ay pupunta at kakain kami sa magagandang lugar pero kapag sasabihin ko na pupunta muna ako ng palikuran upang umihi ay hindi ako maka-ihi. Sa tuwing ako’y magigising at matutulog ulit ay puro ganito ang napapanaginipan ko at nang ako’y magising nan g ikalima ng umaga ay hindi nakakapagtaka kung bakit ganoon ang panaginip ko, halos puputok na pala ang pantog ko nang ako’y magising.
                        Nagtataka si mama kung bakit sobrang aga kong nagising. Hindi na ako muling natulog dahil pupunta pa ako ng maaga sa aming simbahan upang manalangin kaya nang magising ang aking kapatid ay kumain na kami n gaming almusal. Pero kahit maaga man o tanghali kami magising ay nahuhuli pa rin kami sa simbahan dahil sa bagal naming kumilos at kung anu-ano pang kuskos balungos ang pinaggagagawa.
                        Hindi ako nagkamali na huli nga kami dahil pagdating naming ay patapos ng mangaral an gaming pastor at tsaka kami nagsimulang manalangin. Pagkatapos nito ay naglinis kami ng ikatlong palapag dahil sobrang maalikabok, hindi pa kasi tapos ayusin an gaming simbahan. Nang ako’y matapos magwalis ay sobrang pawis na pawis talaga ako at nang makapagpahinga ay tsaka ako gumuhit ng plano para sa gagawing silid para sa pag-aaral na kung saan ay may mga kompyuter. Inaantok talaga ako habang ginagawa ko ito at nang makapagpananghalian ay tsaka naman dumating si ate Thea na guro ng mga bata kung linggo na nagpagguhit din sa aking ng mga larawan. Lalo talaga akong inantok kaya nang makaalis siya ay naglatag ako ng kutson at natulog.
                        Ginising ako n gaming pastor ng ikatatlo ng hapon upang magpraktis sa mga tutugtugin naming bukas. Nang kami ay makapagpraktis na ay tsaka ko muling binisita ang blog ko dahil kailangan kong unti-untiin ang paggawa ng aking mga gawain  dahil dumarami na naman: pagguhit ng mukha ni sir Espina na proyekto naming sa English, pagtapos n gaming pinipinta na proyekto naming sa T.L.E., mga takdang-aralin, at pagpapaskil ng mga pagsusulit sa aking blog na siya naming proyekto sa Filipino. Bakit ba hindi na ako maubusan ng mga gawain? Minsan iniisip ko nalang na mauubos din ito pagdating ng bakasyon. 

Friday, March 8, 2013

Parang Napaka-ikling Araw Naman Ito .

Mahal kong  Talaarawan,
                       
                        Kompleto n asana ang kasayahan ko ngayong araw kaso wala kaming asignaturang Filipino ngayon kaya medyo nakakabagot kahit na may pinasulat sa amin. Bukod kasi sa T.L.E. ay naging hilig ko na rin ang asignaturang ito mula noong ikatlong markahan dahil nakakuha ako ng 80 sa kard noong ikalawang markahan at kinabahan talaga ako dahil muntik ng umabot ng palakol kaya nung ikatlong markahan ay pinagsikapan ko itong mapataas at sa ginawa kong ito ay nalaman ko na kawili-wili din pala ang asignaturang Filipino. Dati kasi ay binabalewala ko lamang ang asignaturang ito dahil Filipino nga lang naman, pero dapat din pala itong pahalagahan dahil ito ang ating wika.
                        Pagkatapos ng aming klase ay hindi agad ako nakauwi dahil ipinagpatuloy naming ng aking mga ka-miyembro sa T.L.E. an gaming isinasagawang pagpipinta dahil sa susunod na linggo na naming ito ipapasa at kung wala kaming maipasa bago magbakasyon ay blanko ang aming marka sa kard kaya pinagsisikapan naming itong matapos ng maaga.
                        Nang matapos ito ay umuwi na ako kasabay ang aking ilang kamag-aral. Sa aming paglalakad pababa ng Siruna ay may dumaan na traysikel at nakisakay kami ditto at pumayag naman. Doon na kami ibinaba sa Francisville kung saan tapat n gaming bahay sa Purok Maligaya II.
                        Pagdating sa bahay ay wala palang ulam kaya nagluto na lang ako ng bihon at napapansin kong puro na lang bihon ang kinakain ko palagi, mula umaga hanggang gabi. Sa tingin ko ay masama na ito.
                        Maaga akong natulog ngayon dahil hindi kami nanood ng pelikula dahil ginagamit ng kapatid ko ang kompyuter sa paglalaro. 

Thursday, March 7, 2013

Ang Paghahanap Namin Ni Papa ng Murang Piyano .


Mahal kong Talaarawan,

    Mga mag-iikalawa na ako nakauwi kanina dahil nag-ensayo pa kami ng aking mga kamiyembro sa mapeh para sa aming itatanghal na ehersisyo bukas. Pagdating ko sa bahay ay kasunod ko ring dumating ang aking kapatid galing sa paaralan at siya muna ang gumamit ng kompyuter kaya wala muna ako ginawa kundi maggitara. Nang hapon na ay dumating na si papa na galing sa trabaho at tinanong ako kung maaari na ba kaming tumingin ng mga binibentang piyano sa mga surplus. Matagal na kasing gusto ni papa na bilihan ako nito dahil nais niyang maituloy ko ang pag-aaral ko ng piyano. May guro ako sa piyano noong nakaraang taon na koreana at sa simbahan niya ako tinuturuan ngunit di nagtagal ay umalis na siya at bumalik sa kanilang bansa kaya nahinto ang aking pag-aaral at wala pa kaming piyano dito sa bahay kaya hindi rin ako makapag-ensayo. Mabuti na lang at iniwan ni ate Yu Jin ang kanyang mga libro sa pagtugtog ng piyano at mag-aaral na lamang ako gamit ang mga ito at kasama ang guro kong youtube.
    May nakita kami ni papa na murang yamaha PSR E323 na nagkakahalaga ng apat na libo at isang-daan pero tinawaran namin kaya tatlong libo na lamang na murang-mura na para sa tatak nitong yamaha kaso nga lang basag ang LCD at sulat ng mga hapon ang nakasulat dito pero ayus lang iyon dahil hindi naman iyon masyadong ginagamit sa pagtugtog at nakalagay naman sa kahon ang mga ingles na nakasulat at papalitan ko nalang. Hindi muna namin ito kinuha at babalikan na lamang namin dahil nanaliksik muna ako sa internet tungkol sa mga bagay na meron dito. Nalaman ko na pitong libo  ang halaga nito kapag bago kaya naisip kong mura na nga ito at maganda pa ang tunog.
Pagkatapos kong manaliksik ay nanood kami nila papa at ng aking kapatid ng isang pelikula na may pamagat na Windstruck. Naiyak talaga ako ng sobra sa pelikulang ito dahil masakit nga naman mawalan ng mahal sa buhay pero bigla na lamang akong natawa nang makita ko ang mukha ni Gyeon Woo sa wakas at dito nagsimula ang kwento ng My Sassy Girl pero hindi siya lasing sa gilid ng riles ng tren at nang ako'y nakahiga na upang matulog ay napaisip talaga ako sa dalawang pelikulang ito, kung ano ba dapat ang inuna kong pinanood. Pero tama nga lang pala na maunang panoorin ang My Sassy Girl dahil,.. ah basta! ewan!
Pero naisip ko rin kung ano kaya ang kahihinatnan ng kwento ng My Sassy Girl kung hindi lasing yung babae. Siguro halos lahat ay mababago. 

Wednesday, March 6, 2013

Yuhu ! Walang Pasok !


Mahal kong Talaarawan,

    Walang pasok ngayon kaya medyo naging masarap ang tulog ko dahil hindi ako gumising ng sobrang aga. Pagkagising ko ay nagbasa muna ako ng isa sa mga libro ni Bob Ong sa celpon. Natapos ko na itong basahin pero binasa ko lang ulit dahil wala pang bago akong mabasa.
    Matapos ito ay iniligpit ko na ang aking hinigaan at binuksan ang kompyuter at ginawa ang aking mga gawain kasama na rin ang aking takdang-aralin. Hindi na naman ako nakapananghalian dahil sa kakapanood ng mga tutoryal sa youtube kung paano tugtugin ang ukelele, nagbabalak kasi akong bumili nito gamit ang aking perang inipon mula sa aking baon at benta sa aking mga ipininta.
    Nang hapon na kumain ako ng kamoteng iniluto ni mama dahil nagugutom talaga ako at naubusan na ako ng kanin. Habang kumakain ay nagbabasa ako ng librong Noli Me Tangere upang malaman ko na ang mga susunod na pangyayari at para na rin makasagot bukas sa mga tanong ni Gng. Mixto. Mahaba-haba rin ang nabasa ko kaya medyo inantok ako pero hindi na ako natulog dahil maggagabi na.
    Pagdating ni papa ay nanood kami ng isang pelikula na may pamagat na The Fox Family na isa sa mga pinaniniwalaang alamat ng mga koreano, mga intsik, at mga hapon. Ito ay tungkol sa pagpupursige ng isang pamilya na maging isang tao sa pamamagitan ng pagkain ng atay o puso ng tao dahil sila ay isang soro pero sa bandang huli ay ang panganay lang na babae ang naging tao dahil inabot sila ng eklipse. Pagkatapos nito ay naglatag na ako ng tutulugan namin ng aking kapatid at tsaka natulog.

Tuesday, March 5, 2013

Nakalimutan Ko Pa Yung Proyekto Ko !


Mahal kong Talaarawan,

    Ikaapat pa lamang ng umaga ay gumising na ako dahil kinakailangan ko pang kulayan ang aming poster. Mag-iikaanim na pala ay hindi pa ako nakakaligo at hindi pa ako tapos magkulay at mahuhuli na ang aking kapatid sa kanilang klase kaya inihatid na siya ni papa at isusunod na lamang ako dahil ayus lang kahit ako ang mahuli dahil mas marami pang nahuhuli kaysa sa aki. Pagdating ni papa ay ako naman ang kanyang inihatid. Pagdating sa paaralan ay nakalimutan kong wala pala akong panulat kaya bumili muna ako at doon ay nakita ko ang aking ilang kamag-aral na bumibili ng polder at hindi ko alam na ipapasa pala ngayon ang aming mga tinipong pagsusulit sa mapeh na amin na ring proyekto, niliban kasi ako nung araw na sinabi na sa martes ang pasahan.
    Nang kinokolekta na ni Gng. Nanculangga ang aming proyekto ay sinabi ko na hindi ko nadala ang akin kaya maaari pa raw magpasa hanggang hapon pero may bawas na ang puntos. Kaya pagkatapos ng aming klase ay agad akong umuwi upang makabalik agad.
    Nang ako'y makakain ay agad akong nagpalit ng damit at isinaayos ang aking proyekto at tsaka naglakad pabalik sa paaralan. Sobra talagang nakakapagod dahil paakyat at sobra pang init, mabuti na lamang at nagdala ako ng payong at tubig.
Nang makarating na ako ay nagpahinga muna ako dahil halos hindi na ako makahinga. Nang ako ay makapagpasa na ay nakipagkwentuhan muna ako sa aking mga kamag-aral na gumagawa ng kanilang poster. Inatasan ako ni Gng. Mixto na iboto ang mga nasa ikatlong taon tungkol sa aming isinagawang maikling pelikula.
Kasabay kong umuwi si Cagas at nang makarating ako sa bahay ay hindi kaagad ako nakagamit ng kompyuter dahil ginagamit ng kapatid ko sa paglalaro at wala akong ibang magawa kaya natulog nalang muna ako at tsaka ako nagsimulang gawin ang aking mga gawain pero hindi ko ito natapos dahil nanood kami ng pelikula na may pamagat na snow flower and the secret fan. Ito ay pumapatungkol sa pangako ng dalawang babae na kahit maraming problema ang dumating sa buhay nila ay habang-buhay silang magiging magkaibigan.

Monday, March 4, 2013

Pangkatan Ba Talaga ?


Mahal kong Talaarawan,

    Ayoko talagang nagpapangkatan kami sa t.l.e dahil sa akin lamang pinapagawa at pinapauwi ang aming gawain at hindi ko naman ito pwedeng tanggihan dahil hindi kami mabibigyan ng puntos kung walang gagawa.
    Akala ko talaga ay walang pasok bukas at sa Miyerkules tamang-tama para gawin ko ang lahat ng aking portfolio pero sa Miyerkules lang pala walang pasok. Pagkatapos ng aming klase ay agad akong umuwi upang maaga kong matapos ang aming gawain sa t.l.e dahil ito'y ipapasa na agad bukas. Nang makakain ng pananghalian ay inuna ko munang gawin ang aking takdang-aralin sa filipino at nang matapos ito ay tsaka ko isinunod ang paggawa ng poster.
    Medyo natagalan ako sa pag-iisip kung ano ang iguguhit hanggang sa pagabi na ng pagabi at ako'y inaantok na kaya bukas ko na lamang ito itutuloy at gigising ako ng maaga.

Saturday, March 2, 2013

Pagsasaayos ng Aking Kwaderno .

Mahal kong Talaarawan,

    Maaga pa ay naligo na ako at nagbihis dahil baka mahuli ako dahil may susundo sa amin papuntang smbahan. Bago magsimula ay muli kaming nagpapraktis ng aming mga tutugtugin at nang matapos ito ay tsaka nagsisimula ang pangangaral ng aming pastor.
    Nang matapos kaming magsimba ay umuwi na ako kasama ang pinsan ko na pumunta dito sa bahay dahil hihiramin niya ang aming wimax at ito'y aayusin. Nang siya ay umuwi na ay muli kong itinuloy ang isang kantang pinag-aaralan ko sa gitara at tsaka ko inayos ang aking kwaderno sa English na ipapasa bukas.

Ako'y Nahuli sa Aming Pag-eensayo .


Mahal kong Talaarawan,

    Pagkagising ko ay naggitara muna ako bago magligpit ng aking hinigaan at pagkatapos nito ay tsaka kami nag-almusal ni mama. Tuwing sabado naglalaba si mama kaya ako ang inutusan niya na mamalengke at maglinis ng bahay.
Tanghali na nang kami ay matapos at ako'y naligo na dahil pupunta kami ng simbahan ni Nemuel na kasama ko sa pagtugtog. Pero nang pumunta ako sa bahay nila ay nakaalis na pala siya kaya hinintay ko na lamang si papa dahil inihahatid niya ako pero ikatatlo siya ng hapon nauwi. Hindi na ako nakapananghalian dahil nakalimutan ko at tinatamad na ako kumain kapag ako nakapagsipilyo na.
    Pagdating ni papa ay umalis na kami. Nang ako ay makarating sa simbahan ay nagsisimula na silang magpraktis at mabuti'y madadaling kanta lamang ang aming tutugtugin.
    Gabi na ng ako ay makauwi dahil meron kaming pagpupulong para sa mga kabataan sa simbahan.

Friday, March 1, 2013

Isang Nakakapagod Na Araw -_-


Mahal kong Talaarawan,

    Hindi ko akalain na ililiban pala kami ni G. Espina sa buong klase upang makibahagi sa eksibit. Sobra talaga akong nabagot dahil wala kaming ibang ginawa kundi ang magpaliwanag ng mga nakalagay sa eksibit at magpakita kung paano ito ipinipinta.
    Nang sumapit ang aming libreng oras ay pumunta muna ako sa aming silid-aralan dahil nais kong makita ang aking mga kaibigan at makipagkwentuhan pero nang matapos ang aming libreng oras ay bumalik na ako sa entablado kung saan isinasagawa ang eksibit.
    Nang tanghali na ay nagkita kami ni Jelly at pinahiram niya ako ng pelikulang Rooftop Prince at Secret Love dahil binigyan ko siya ng kopya ng pelikulang A Werewolf boy. Matapos ito ay kumain na ako ng pananghalian kasama si Dexter na kasama ko sa pagpapakita kung paano magpinta. Ginawa namin ito hanggang hapon at nang matapos na ay nagligpit na kami at tsaka namin pinaghati-hatian ang mga nabiling pinta namin.
    Ikalima na ng hapon nang kami ay matapos at ako'y nagsimula ng lumakad pauwi kasama sina Carpio at Izon. Pagdating sa bahay ay sobra talaga akong napagod at masakit ang mga binti ko dahil matagal kaming tumayo kanina. Nang ako ay makakain ay pinanood ko ang pelikulang Secret Love na pinahiram sa akin ni Jelly kasama si mama. Hanggang ikalawang bahagi lamang ang napanood ko dahil mayroon itong sampung bahagi at ang isang bahagi ay isang oras. 

Thursday, February 28, 2013

Paghahanda Para sa Eksibit !

Mahal kong Talaarawan,


    Nang magsimula ang aming libreng oras ay agad na naman akong ipinatawag ni G. Espina kasama ang aking mga kamag-aral na kasama ko sa pagpipinta. Inatasan niya kami na isasaayos na namin ang lahat ng pinta para sa eksibit bukas. Ililiban na lamang niya kami sa dalawang huling asignatura pero nang matapos siyang makapagturo sa aming silid-aralan ay bumalik ako sa aming silid-aralan dahil ayaw ko nang maliban dahil wala akong naisusulat sa aking kwaderno, kulang sa mga pagsusulit, hindi ko naipapasa ang aking mga takdang-aralin, at nanghihinayang ako sa mga itinuturo na kahit minsan ay hindi ko naman maintindihan.
Nang matapos ang aming klase ay kumaripas ako ng takbo dala ang aking kustal papunta sa aming pinagpipintahan upang hindi malaman ni G. Espina na bumalik ako sa silid-aralan. Ang saya ko nang makita ko doon si Vega na aking kaibigan sa ikalawang pangkat at mas lalo akong sumaya nang sinabi niya na sabay kami uuwi dahil hindi siya makakapasok dahil aalis siya. Bihira ko na lamang kasi siyang makita at malungkot kapag walang kasabay sa pag-uwi lalo na't naglalakad ka.
    Ikaapat na ng hapon nang ako ay makauwi dahil medyo natagalan kami sa pag-aayos ng entablado dahil doon  gaganapin ang eksibit bukas.
Natuwa din ako na nagustuhan ng aking mga kamag-aral ang aking isinaayos na mtv na proyekto namin sa E.P. Ito ang aking unang pagkakataon na magsaayos at natuto ako sa tulong ng youtube na kung saan ako ay nanonood ng mga tutoryal na talaga namang malaki ang naitutulong sa akin maging sa ibang gawain.

Wednesday, February 27, 2013

Araw ng Interbyu .


Mahal kong Talaarawan,

    Pagkatapos ng aming klase ay hindi muna ako umuwi dahil ngayon ang araw na ako ay iinterbyuhin ni Bb. Tayamora. Kinakabahan talaga ako at nang ikalawa na ng hapon ay nag-ayos na ako dahil kasama din ang kaayusan at kahandaan ng sarili. Nang ikalawa at kalahati na ng hapon ay tumungo na ako kay Bb. Tayamora at sobra akong kinakabahan ng mga oras na iyon dahil ingles dapat ang wika na gagamitin pero kung hindi mo na kaya ay maaari nang mag-tagalog. Sa una ay puro ingles ang isinasambit ko ngunit nang sa kalagitnaan na ay filipino na ang wika na ginamit ko dahil hindi ko na kaya at sobrang makapigil-hininga ang mga itinatanong, meron pa ngang isang tanong na hindi ko nasagot at hindi ko alam kung bakit. Nang matapos ito ay umuwi na ako at sa aking paglalakad pauwi ay nagsasalita akong mag-isa at tinatanong ang aking sarili kung mapupunta pa kaya ako sa unang pangkat sa sunod na pasukan. Wala naman kasing mga tao sa pababa ng Siruna kaya ayus lang. Sa totoo lagi akong nagsasalita ng mag-isa kung ako ay uuwi ng alanganin. Iniisip ko yung mga nangyayari sa akin sa paaralan.
    Pagdating ko sa bahay ay kumain na ako dahil hindi na ako nanananghalian kahit ikatatlo na ng hapon. Matapos ito ay tsaka ko ginawa ang aking mga takdang-aralin.

Tuesday, February 26, 2013

Maaga Akong Nakauwi .


Mahal kong Talaarawan,

    Dala ko sa aking pagpasok ang ipininta kong kabayo na binili ni G. Ligutan. Pagkatapos ng aming klase ay hindi agad ako umuwi dahil nakipagkwentuhan pa ako sa aking mga kaibigan. Minsan kasi parang ayaw kong umuwi agad dahil parang gusto ko pang makasama ang aking mga kaibigan sa mas mahabang oras.
    Pag-uwi ko sa bahay ay nagulat si mama na maaga akong nakauwi, madalas kasi akong umuuwi ng ika-tatlo ng hapon. Sabay kaming nananghalian ni mama at pagkatapos nito ay hindi agad ako nakagawa ng aking mga takdang-aralin dahil lagi na lamang akong sinusuyudan ni mama kahit wala naman siyang makuha.
    Pagkatapos nito ay tsaka ko ginawa ang aking mga takdang-aralin at kami ay nanood ng isang pelikula na may pamagat na "The Thieves". Nakakatawa ito dahil ang mga bidang magnanakaw ay pinagnanakawan din ang kanilang kapwa magnanakaw at pagkatapos nito ay natulog na ako.

Monday, February 25, 2013

Natapos Din Ang Mga Gawain .


Mahal kong Talaarawan,
   
    Maaga akong nagising ngayon dahil walang pasok kaya habang wala akong magawa ay sinimulan ko na ang paggawa ng aking portfolio sa math na ipapasa bukas. Nang matapos ko ito ay naligo muna ako bago ko isunod ang aking pagpipinta, madalas kasi akong mahilo kapag ako'y nagpipinta o kaya'y magkompyuter. Nang matapos akong maligo ay tsaka ako nagpinta ng kabayo na bibilihin ng isang guro sa aming paaralan. Nakalimutan ko na ring kumain ng pananghalian dahil sa kakagawa nito pero natapos ko naman.
    Pagkatapos kong magpinta ay nagluluto na si mama para sa hapunan at ako'y kanyang pinabili sa talipapa ng niyog. Nang ako'y makabili na ay pumunta muna ako kila Jelly na aking kaibigan sa ikalawang pangkat na nakatira malapit sa talipapa. Pagbalik ko sa bahay ay nagalit sa akin si mama dahil ang tagal-tagal ko raw bumalik pero sinabi ko na dumaan muna ako kila Jelly.
    Nang matapos akong utusan ni mama ay ipinagpatuloy ko ang pagsasaayos ng aming mtv na aming proyekto sa E.P. at ipinaskil ko na rin ito sa youtube dahil dito daw ito itsetsek ni ma'am Tayamora. Gabi na nang ito'y matapos pero nanood pa kami nila papa ng isang pelikula na may pamagat na A Werewolf Boy. Nakakatawa at nakakaiyak itong pelikulang ito pero hindi ko pinapatulo ang aking luha dahil nahihiya ako na makita ako nila papa.

Sunday, February 24, 2013

Lagi Na Lamang Ipinagpapabukas !


Mahal kong Talaarawan,

    Pagkauwi ko sa bahay matapos ng simba ay gagawin ko na dapat ang aking proyekto sa math pero lagi na lamang akong pinapabunot ni mama ng kanyang puting buhok at medyo natagalan. Matapos ito ay niyaya kaming manood ni papa ng pelikula, A Werewolf Boy sana ang papanoorin namin pero Journey To The West na lang daw dahil maganda rin daw iyon. Nagustuhan ko ito dahil mahilg ako sa mga pelikula ng koreano, intsik, indiyano, at abentura naman kung sa amerikano.
Matapos naming manood ay hiniram ko muna ang kompyuter at napunta ako sa pagsasaliksik ng tabs ng kantang I belive at aking pinag-aralan sa gitara dahil napagtanto ko na maganda pala ang kantang ito nung mapanood ko ang My Sassy Girl ngunit hanggang koro lamang ang aking natapos dahil may dumating na bisita kaya ipinapatay muna ni mama ang kompyuter. Napansin kong gabi na pala at nakalimutan kong gawin ang aking proyekto sa math kaya napagdesisyunan kong bukas na lamang ito gawin at tatapusin ko na talaga ito bukas, pangako.